ក្រសួងសុខាភិបាល ណែនាំឲ្យអាជ្ញាធររាជធានី-ខេត្ត ត្រូវពង្រឹងការតេស្តរហ័សគ្រប់អ្នកដំណើរទាំងអស់ឱ្យបានម៉ឺងម៉ាត់
ភ្នំពេញ: នៅថ្ងៃសុក្រ ទី១១ ខែមិថុនា ឆ្នាំ២០២១ ក្រសួងសុខាភិបាល ណែនាំឲ្យអាជ្ញាធររាជធានី-ខេត្ត ត្រូវពង្រឹងការត្រួតពិនិត្យសុខភាពអ្នកដំណើរចូលមកកម្ពុជា តាមច្រកព្រំដែនទាំងផ្លូវអាកាស ផ្លូវគោកនិងផ្លូវទឹក ត្រូវធ្វើតេស្តអង់ទីហ្សែនរហ័សឲ្យបានម៉ឺងម៉ាត់។ អ្នកជំងឺដែលមានវិជ្ជមានកូវីដ-១៩ ត្រូវបញ្ជូនទៅកាន់មន្ទីរពេទ្យដើម្បីព្យាបាលចំណែកអ្នកដំណើរផ្សេងទៀតដែលរួមដំណើរជាមួយអ្នកវិជ្ជមានកូវីដ-១៩ ត្រូវបញ្ជូនទៅកាន់មណ្ឌលចត្តាឡីស័ករយៈពេល១៤ថ្ងៃ។
ក្រសួងសុខាភិបាលបានបន្តទៀតថា អភិបាលខេត្តនៅតាមព្រំដែនថៃនិងវៀតណាម ត្រូវប្រជុំជាមួយសមភាគីថៃ ឬវៀតណាម ដើម្បីស្នើសុំកិច្ចសហការក្នុងការពង្រឹងការធ្វើតេស្តរកមេរោគកូវីដ-១៩ ជូនដល់ពលករនិងប្រជាជនទូទៅមុននឹងអនុញ្ញាតឲ្យមកកម្ពុជាវិញ៕
